ചൈനയിൽ ലേസർ-ഇഗ്നൈറ്റഡ് ഫ്യൂഷൻ റിസർച്ച് സെൻ്റർ നിർമ്മാണം പുരോ​ഗമിക്കുന്നു; സാറ്റ്ലൈറ്റ് ചിത്രങ്ങൾ പുറത്ത്

ബെയ്‌ജിങ്‌: ചൈനയിൽ ലേസർ-ഇഗ്നൈറ്റഡ് ഫ്യൂഷൻ റിസർച്ച് സെൻ്റർ നിർമ്മാണം പുരോ​ഗമിക്കുന്നതായി റിപ്പോർട്ട്. ചൈനയുടെ തെക്കുപടിഞ്ഞാറൻ നഗരമായ മിയാൻയാങ്ങിലാണ് റിസർച്ച് സെൻ്ററിന്റെ നിർമ്മാണം പുരോ​ഗമിക്കുന്നത്. ഗവേഷണ കേന്ദ്രത്തിന്റെ സാറ്റ് ലൈറ്റ് ചിത്രങ്ങൾ ഇതിനോടകം തന്നെ പ്രചരിച്ചു തുടങ്ങിയിട്ടുണ്ട്. ആണവായുധങ്ങൾ രൂപകൽപ്പന ചെയ്യുന്നതിനും വൈദ്യുതി ഉൽപാദനം പര്യവേക്ഷണം ചെയ്യുന്നതിനും സഹായിക്കുന്ന വികസനമാണ് ഇതിലൂടെ ലക്ഷ്യമിടുന്നതെന്നാണ് അനലിറ്റിക്കൽ ഓർഗനൈസേഷനുകളിലെ വിദഗ്ധർ പറയുന്നത്.

ലേസർ ബേകൾ ഉൾക്കൊള്ളുന്ന നാല് ഭാ​ഗങ്ങളും, ഹൈഡ്രജൻ ഐസോടോപ്പുകൾ അടങ്ങിയ ടാർഗെറ്റ് ചേമ്പർ ഉൾക്കൊള്ളുന്ന ഒരു കേന്ദ്ര പരീക്ഷണ ഭാ​ഗവും സാറ്റ് ലൈറ്റ് ചിത്രത്തിൽ കാണാൻ സാധിക്കുന്നുണ്ട്. വടക്കൻ കാലിഫോർണിയയിലുളള യുഎസ് നാഷണൽ ഇഗ്നിഷൻ ഫെസിലിറ്റിക്ക് സംവിധാനത്തിന് സമാനമാണ് ഈ റിസർച്ച് സെൻ്ററെന്ന് അന്തർദേശീയ മാധ്യമങ്ങൾ റിപ്പോർട്ട് ചെയ്യുന്നു.

എന്നാൽ നാഷണൽ ഇഗ്നിഷൻ ഫെസിലിറ്റിയേക്കാൾ മികച്ചതും വലുതുമാണ് ചൈനയുടെ ലേസർ-ഇഗ്നൈറ്റഡ് ഫ്യൂഷൻ റിസർച്ച് സെൻ്റർ എന്ന നിഗമനവും പുറത്ത് വരുന്നുണ്ട്. ജെയിംസ് മാർട്ടിൻ സെൻ്റർ ഫോർ നോൺപ്രൊലിഫെറേഷൻ സ്റ്റഡീസിലെ (സിഎൻഎസ്) വിശകലന വിദഗ്ധരാണ് ഇത്തരത്തിലൊരു നി​ഗമനം പങ്കുവെയ്ക്കുന്നത്.

നാഷണൽ ഇഗ്നിഷൻ ഫെസിലിറ്റി സൗകര്യമുള്ള ഏതൊരു രാജ്യത്തിനും ഇത്തരത്തിൽ ആയുധ രൂപകല്പനകൾ മെച്ചപ്പെടുത്താൻ സാധിക്കുമെന്ന് ഹെൻറി എൽ-ലെ ന്യൂക്ലിയർ പോളിസി അനലിസ്റ്റായ വില്യം ആൽബെർക് പറഞ്ഞു. എന്നാൽ സാറ്റ്ലൈറ്റ് ചിത്രങ്ങളെ കുറിച്ചുളള വിശകലനത്തിൽ ചൈനയുടെ ശാസ്ത്ര സാങ്കേതിക മന്ത്രാലയം ഇതുവരെ പ്രതികരിച്ചട്ടില്ല.

Content Highlights: Satellite photos show China building large fusion research facility